Pasty a Gernow

CORNISH PASTY

Gans nôtyans grassys dhe Cowethas an Pasty a Gernow (Cornish Pasty Association)

Devnyth

Dhe'n past brew (y hyller ûsya past pyff garow inwedh):

500 gràm bleus bara crev (bysy yw ûsya bleus crev, awos crefter addys i’n glûten dhe vos owth ascor past gwethyn crev)

120 gràm blonek gwydn

125 gràm amanyn a Gernow

1 lo tê holan

175 mylylîter dowr yêyn

Dhe'n gwalhans:

400 gràm bowyn losten (‘beef skirt’) dâ y gwalyta, trehys dhe dhîcyow

300 gràm patâtys, dyruskys ha dîcys

150 gràm tùrnyp (h.y. swed, adar tùrnyp gwydn), dyruskys ha dîcys

150 gràm onyon, dyruskys ha trehys

Holan ha puber (kebmyns 2:1)

Oy fustys / leth rag kenen

MANER PARUSY

Gwra keworra an holan dhe’n bleus in scala kemysky. Rùttya an dhew sort a vlonek aberth i’n bleus yn scav bys may fo hevelep dhe vrowsyon bara. Keworra dowr, dry an kemysk warbarth, ha tosa bys may fo an past gwethyn. Y whra pelha termyn ès yw dhe wil gans past normal, mès yma ow ry an crefter dhe’n past eus otham anodho rag sensy an gwalhans ha gwitha shâp dâ. Y hyller ûsya kemyscor boos. Gwra cudha gans kenen vytel ha gasa dhe bowes 3 ourys i’n yêynor. Hèm yw stap meur y bris, dre rêson rolya ha shâpya an past dhe vos ogas ùnpossybyl pàn yw nowyth gwrës. Gwra rolya an past in mes ha trehy dhe gelhow 20 centymêter aga threuslînen ader dro. Plât tenewen yw brâster delvrysek rag ûsya avell gedyor. Gwra gorra an losow ha’n kig wàr an past gwyscas ha gwyscas, owth addya plenta saworyans. Mailya an past adro ha cryhy an emlow warbarth. Gorra kenen oy fustys pò oy ha leth kemyskys. Pobas in 165 degrê Celsyùs (forn wynsel) rag 50-55 mynysen, ader dro, bys may fo owrek.

CÙSSUL A BROW

Bowyn losten (‘beef skirt’) yw an trogh kigereth ûsys in pastys teythiak a Gernow. Hèm yw torr an best awoles. Nyns eus gyew, bohes yw an berry, kegys a vëdh gans an losow criv i’n kettermyn, ha’y sùgan ow qwil sows marthys dâ. Gwra ûsya patâtys ferv ha corus, rag ensompel Maris Peer pò Wilja. Patâtys bleusek a wra mos dhe vrewyon pàn vowns y kegys.

MANER CRYHY

Gwra scubya amal an past gans dowr.

Plegya an hanter aral a’n past dres an gwalhans ha gwasca emlow an hanter-kelgh warbarth yn fast.

Pockya wàr amal an past dhe’n dor ha trailya amal an past rag formya crygh.

Gwra arta hag arta, wàr amal an past ahës.

Pàn re wrusta cryhy an amal oll ahës, gwra plegya an pednow dewetha wàr woles.

An pasty yw cowlwrës ha parys dhe’n forn.