RÙMY JYNEVRA
Gwary dhe dhew warior
MEDER
Cafos dorn mayth yw an brâssa radn a’n cartednow pò oll anodhans dhe dhysqwedhes in settys – hèn yw, teyr harten pò moy a’n keth renk – ha holyansow, yw teyr harten pò moy i’n keth sewt hag in kevres. Nyverednow yw recknys a dalvesygeth aga fâss, valew pùb carten lÿs yw deg, hag y tal pùb âss onen.
AN RADNANS
Yma pùb gwarior ow recêva deg carten, rydnys onen hag onen. Wosa an radnans, an nessa carten yw trailys in bàn rag growndya an dhas scùll ha’n remenant yw gorrys y fâss dhe’n bord rag formya an stock.
MANER AN GWARY
Yma an gwarior na wrug radna ow tallath pùpprës. Res yw dhodho kemeres an garten drailys pò gasa passya, hag i’n câss-na yma dhe’n radnor an keth dôwys. Gasa passya mar qwra aga dew, res yw dhe’n gwarior na wrug radna kemeres an garten awartha wàr an stock. Alebma in rag, y hyll pùb gwarior kemeres carten dhywar an eyl das pò hy ben. Rag gorfedna y dro, res yw dhe bùbonen scùllya neb carten ha’y fâss in bàn wàr an dhas scùll. Mar qwra gwarior dôwys kemeres an garten drailys, ny yll hy scùllya i’n keth tro.
KNOUKYA
Y hyll pùb gwarior qwyttya trygh dre ‘gnoukya’ – hèn yw, scùllya udn garten ha’y fâss dhe’n bord wàr an dhas scùll ha dysqwedhes an remenant a’y dhorn, arayes kebmys dell yll bos in holyansow hag in settys. Rag may fo an knouk alowys, res yw dhe’n ‘predn marow’ (talvesygeth an cartednow nag yw arayes indella) heb bos moy ès 10 poynt. Knoukya heb predn marow vëth i’n dorn yw cries ‘mos jynevra’ hag y tal bonùs addys. Yma an gwary ow cessya kefrës mars yw an stock lehës bys in dyw garten ha’n gwarior neb a gemeras an dewetha carten saw dew ow scùllya heb knoukya. I’n câss-ma, nyns eus scor ha’n keth radnor ow radna arta. Pàn re wrug gwarior knoukya, yma an gwarior contrary ow tysqwedhes y gartednow. Unweyth mar ny wrug an knoukyor mos jenevra, an gwarior contrary a yll gorra dhe ves cartednow nag yw arayes solabrës, in udn istyna pelha an holyansow ha settys a veu gorrys gans an knoukyor wàr an bord. Nyns yw an fordh aral alowys bytegyns – nefra ny yll an knoukyor gorra dhe ves cartednow nag yw arayes.
RECKNA AN SCOR
Wàr dhyweth an fyt, yma pùb gwarior ow comptya cowl-valew y gartednow nag yw arayes. Mars yw sùm an knoukyor uhella ès sùm y gontrary, scor an knoukyor yw recknys dhe vos (1) an dyffrans inter an dhew sùm, ha (2) bonùs a 20 poynt mar qwrug ev mos jynevra, ha (3) sùm an contrary. Mars yw sùm an knoukyor le ès sùm y gontrary, pò mars yw an sùbmys kehaval, scor an gwarior contrary yw reknys dhe vos (1) an dyffrans inter an dhew sùm, ha (2) bonùs a 10 poynt rag an ‘trogh in dadno’, dell yw cries.
DYWETH
Res yw dhe warior drehedhes scor a 100 poynt pò moy rag gwainya an gam. Yma gwarior ow recêva bonùs a 20 poynt rag pùb fyt gwainys ganso, ha gwainyor an gam ow keworra bonùs addys a 100 poynt moy – 200 poynt mar ny spêdyas an gwarior fethys scorya poynt vëth. Pàn yw oll an poyntys cowl-recknys, yma an gwarior mayth eus an iselha scor ow pe dhe’n gwainyor mona perthynek dhe’n dyffrans inter an dhew scor, ha hedna doblys mar ny spêdyas an gwarior fethys gwainya fyt vëth.